Les 4

t Gebruuk van de komma (apostrof)

 

 

 Regels: 

Aan de linkerkaant van n letter of n woord schrieven wie gain komma.

As der aan de rechterkaant van n letter of n woord wat votloaten is, schrieven we wel n komma.

k (ik) In t Grunnegs schrieven wie "ik" mainsttied as  "k". Veur de "k" mag je gain komma schrieven! Links is n letter votloaten en din bruken wie ja gain komma.

As je de noadruk leggen willen op joezulf din schrief je "ik". Biev. Ik wait t wel (en d'aandern dus nait).

 
Veurbeeld 1 Dat dou k geern.

 
   
t  t Lidwoord "het" schrieven wie in t Grunnegs as "t" (ook weer zunder komma).

 
Veurbeeld 2 As t even kin mout t lokken.

 
   
n  Ook veur t lidwoord "een" hebben wie 1 letter, noamelk "n". (Krek....., ook weer zunder komma).

 
Veurbeeld 3 Ik heb n hond en zai het n kat.

 
   
de t Lidwoord "de" schrieven wie mainsttied voluut. 

As "de" volgd wordt deur n woord dat begunt mit n klinker of n "h"din schrieven we "d' ".

Rechts loaten wie din de letter "e" vot en doarveur schrieven wie n komma (apostrof). Tussen de "d'" en t volgende woord komt gain ruumte (spaatsie)!

Biev.: d'eerste, d'aander, d'hond, d'opgoave

As "d'" aan t begun van de zin staait, schrief je hom klaain. t Woord doarnoa begunt mit n hoofdletter. (d'Eerste ..... , d'Aander ......, d'Hond ........ ).

Asmis wordt t lidwoord "de" veur n medeklinker uutsproken mit n stomme "e". Ook din kin je n apostrof bruken (d'regen, d'jacht, d'joager).

 
Veurbeeld 4 d'Oabe en d'eulifant zaten d'haile tied achter d'antilopen en d'jaguars aan.

 
   
smörgens/smörns n Biezundere schriefwieze hebben woorden as:

"smörgens", "soavends", swoensdoags", "snommerdoags" enz. De letter "s" zit aan t woord vast. Gain komma's dus.

Dat is ook zo aan t begun van n zin. Dus: "Smörgens", "Soavends" enz.

 
Veurbeeld 5 Smörgens bin k op tied van bèr, mor soavends lig k ter weer vroug op.

 
Diktee Vertoal de volgende zinnen in t Grunnegs
  Morgen organiseren we een groot feest.
We hebben de hele buurt uitgenodigd.
's Morgens vroeg al komen de eersten.
Bovendien komt er een orkest.
Het feest duurt tot 's avonds laat.
 
Joen reaksies noar:

eltjedoddema@hetnet.nl